أهداء إلى الطالبة
أنا بنت مصر
بقلم شاعر الأمة العربية
سلطان ابراهيم عبد الرحيم
يا فجر يللي كلمتك في الضلما فجر
يا صوت بلدنا يا أمل في أغلى نصر
مليون تحية من قلوب حست بفخر
لما ارتفع صوتك وقال أنا بنت مصر
يا فجر شقشق وهزم سود الليالي
يا فجر طل بنسمتو وضحك قبالي
فضح المخادع والملاوع والضلالي
قال للشايف واللي خايف مش هبالي
القعدة دي مترتبة ومتفبركه
قعدة أصول في المحلسه وف السهوكه
شحات وجي بالزفة عامل دربكه
ووراه شلل في الفزلكه والأنتكه
لكن فجر الحق جي بيشع نور
والحق دايما كلمتو فوق كل زور
قولي يا فجر وعلمي كل النسور
طول ما احنا جوانا النفس لازم نثور
طول مانت فيك يا بلد أجدع ولاد
الفجر جايلك يا بلد يطوي السواد
يا بهية بكره هتخلعي توب الحداد
وياسين هيرجع يا بهية في المعاد
