من روائع الشاعر
طه متولى رضوان
====
قلت ١٠٠ مرة
أنا عاشق وأنا ولهان
وكاتب شعر ف عيونك
بألف ديوان
وبسهر ليلي في عيونك
واسمي الشعري مجنونك
ونبض القلب مضمونك
وحضنك آخر العنوان
لمين الشعر غير ليك ؟
ومبفكرش غير فيك
وطايف عمري حواليك
يا أغلى زهرة في البستان
عشانك بنجلد وبموت
ومش قادر أطلع صوت
وعمري كل يوم بيفوت
وأنا ساكت وبحميك
على شطك ببات ليلك
وطول الليل بغنيلك
وبنسى الدنيا وبجيلك
يا مية للي مات عطشان
منيش قادر أقول وأبوح
وقلبي لك كتاب مفتوح
وترخص في هواك الروح
وبدعيلك في كل أدان
أنا عمري ما أخاف منك
ولا هبعد في يوم عنك
وزعلان منك اكمنك
آمنتي له وهو جبان
شايف عينك ملانة دموع
وصوتك صرخة الموجوع
قولي لي نهاية الموضوع
وأنا هقتل لك السجان
قولي لي يا مصر أعمل إيه
وكل طريق واقف لي عليه
عميل خاين جبان وسفيه
شيطان كافر بكل أدان
هعيش على حلم يوم النصر
ونرجع تاني جوة القصر
وترياقي في كلمة مصر
وحضنك آخر العنوان
وحضنك عندي أحلى مكان
عاشقك يا مصر
===============
طه رضوان
