زفة الثوار
بقلم شاعر الأمة العربية
أبدأ منين يا وطن؟
ولا أقولك إيه ؟
والوم عليك يا زمن ؟
ولا الملامه ليه ؟
دا الجرح صابو العفن
ولا حد طلّ عليه
و العمر مالهوش تمن
والحق فين ألاقيه ؟
ياهل الله ياللي هنا
ياهل الله يللي هناك
ياللي حياتكم ضنا
وماشيين على الأشواك
ليلكم نهاركم عنا
عيشه هلاك في هلاك
تتمنوا لحظة منى
تطل م الشباك
واقف بعيد يا فرح
مستني مين يناديك
شجر المآسي طرح
وبيوتنا نفسها فيك
والقلب لما سرح
طلب يروح أراضيك
كل اللى فينا انجرح
جايين عشان نرضيك
يا فرح خش الدار
دا الكل مستني
وكفايه ليل يانهار
دا الفجر متحني
وفي زفة الثوار
يالله يا طير غني
وافرش عمار وخضار
وعيشني متهني
