بقلم الشاعرة
بنت الأكرمين
عواد دا كان مصري
عايش فبيت مصري
له ارض يزرع فيها
وبياكل من خيرها
وبطينها بنى بنية
وغطاها بالحصري
وعنده شوية طير
وجاموسه بتجيب خير
وفيوم قابل خواجة بيرطم بالعبري
بس بجلابيه وعمه تشوفه تقول مصري
لكن الجلابيه مش هيا جلابيه عواد دي بتضوي
والعمه برده ياواد عمه حواليها برواز تقولش ملكي
لا وايه راكب عربية بيجرهم فرسين أصلي
عواد شافه عنيه زغللت ورجليه اتبرجلت
وماداقش النوم طول الليل وفكره بيغلي
لازم يلبس زي الخواجه العبري
طلع الصبح لم جرشناته وعالخواجه دوغري
جاله ياخواجه الله يهديك انا واقع فعرضك ابوس رجليك
خود جيرشناتي وهاتلي جلابيتك اللي بتضوي
عايز اتعايق بيها في الحته واعجب بنات خالي وعمي
رد الخواجه بالمصري:
جاله جرشناتك ماتكافيش تملك ايه تاني قولي
قاله ماملكش من الدنيا غير أرضي
لمعت عنين الخواجه وقال فسره دا غرضي
جاله أرضك بس ماتساويش
أزاي حتلبس لبسي وانت شنباتك مترين
بص ياعواد ارضك تساوي ألف حديك كمان ألف للشنب حلوين
قالوا طب بس ياخواجه وآكل منين؟؟!!!!
جاله اللي يلبس لبسي بيجيلي الرزق اتنين
فرح عواد وقال ……..متفقين
#عواد_باع_أرضه
#بنت_الأكرمين
