( الغربة كربة )
للشاعر طه رضوان
قصيدتي بصوتي تحكي عن متاعب الغربة وفقدان الأهل والأحباب
الغربة
=====
سنين الغربة وخدانا
بقالنا كتير
وعشنا فيها بالدمعة
وبالتفكير
قرار الرجعة مش عارف
غلط أو خير
وعشنا هناك في دوامة
ودوخنا خلاص
من التدوير
اغتربنا
والحبايب قالوا عنا
كلام كتير
وانكربنا
ما حد جانا
وقال لنا
يا حبايبي خير ؟
اللي قال :
عايش في جنة
واللي قال :
عايش أمير
واللي قال :
سابنا وهاجر
له هناك
قصره الكبير
والبعيد عمال يهاتي
والرصيد بيزيد يوماتي
حتى قالوا :
شرى له بير
كل يوم
جايبين سيرتنا
كان كبير
أو كان صغير
*****
قالوا باشا وقالوا بيه
وأنت تضحك بابتسامة
ترضي بيها
هتعمل إيه ؟
والحقيقة الله وكيلك
غربة كربة
مفيش شبيه
كل يوم الدمع جاري
غصب عنك
دوم تداري
بدون سؤال
لا ازاي وليه
شوفوا حالكو
وشوفوا حالي
واعرفوا
إيه اللي جرالي
نفسي مرة تقدروا
روحي وجروحي
وتتركوا فلوسي ومالي
*****
نفسي مرة تقولوا كلمة
ليها عازة
كم ألف مرة
فرحتوا أنتو
رقصتو انتو
حضرتو كام مليون جوازة
واحنا الحبايب
يفرحوا
ويتجوزوا
وبيولدوا
وبيكبروا
ويجوزوا
واحنا هناك
ولا لينا عازة
فاكرين أبويا؟
يوم ما مات
وحدي بكيت
وكأني نكرة ف أي بيت
يومها انكسرت
وقلت بقلبي للدنيا
يا ريتني ما روحت
يوم ولا جيت
ندمت كتير
ومن امتة هتنفعنا
دموع وياريت
ما عرفت يومها
أروح له أبوسه
وأدفنه
يوم الجنازة
*****
مات واندفن
ومشفتهوش
وسنين حياتي
بقت فشوش
والأم ماتت
وأنتو برضو
متسكتوش
والعم مات
ومشفتهوش
وخالي مات
ومشلتهوش
كم ألف واحد
م الحبايب
عني راح ومعزيتوش
عايش كأني
في بحر تايه
بنحرق
بصرخ ولكن
كلكم مبتسمعوش
*****
عايش لوحدي ف غربتي
من غير جيران
ولا حد يوم يسألني
مالك ؟
أو ما شفناك من زمان
وإن يوم تعبت
مفيش ايدين
تلمس ايديك
ولا حد جنبك
هيواسيك
ولا حد يومها
يخاف عليك
لو مت حتى ما يعرفوا
إلا بريحتك
يوم تفوح
عند الجيران
*****
الغربة عزلة
تحسسك إنك وحيد
كل السنين دي ف مرمطة
ومفيش جديد
ولا يوم هتفرح
بالفلوس
ولا حتى عيد
كل الساعات بتهد فيك
والهم فيك عمال يزيد
والدم يصرخ م الشقى
والنار تقيد
تكبر تلاقي ولادك انت
بيتعبوك
أصل العلاقة بقت فلوس
لو زهقوا منك هيبيعوك
وإن يوم رجعت لهم
يقولوا :
امتة يابة
عرفت انك ليك ولاد ؟
علطول سايبنا بهمنا
وعمال تلفلف
في البلاد
لا عرفت مين فينا نجح
ولا مين رسب
والهم زاد
دلوقتي جاي عايز تحاسب ؟
خليك في حالك وانكتم
وان يوم قاوحت هيضربوك
*****
وتحس موتك لك دوا
ومتلقهوش
ومفيش حنين م الولاد
عنك يحوش
ياللي انتو حاسديني
هو انتو إيه ؟
مبتفهموش ؟
ياللي انتوا حاسدينا
افهمو ومتحسدوش
خدوا كل حاجة جمعتها
خدوا كل أكلة أكلتها
خدوا كل بدلة لبستها
خدوا كل حاجة كسبتها
ومتحسدوش
وادوني عمري اللي اتنهب
ومعشتهوش
وادوني حضن امي
اللي راح
ومحستوش
وادوني حضن امي
اللي راح
ومحستوش
طه رضوان
[contact-form][contact-field label=”الاسم” type=”name” required=”true” /][contact-field label=”البريد الإلكتروني” type=”email” required=”true” /][contact-field label=”الموقع” type=”url” /][contact-field label=”رسالة” type=”textarea” /][/contact-form]
[contact-form][contact-field label=”الاسم” type=”name” required=”true” /][contact-field label=”البريد الإلكتروني” type=”email” required=”true” /][contact-field label=”الموقع” type=”url” /][contact-field label=”رسالة” type=”textarea” /][/contact-form]
