بقلم الشاعرة
بنت الأكرمين
الشهيد حى
الشعب المغربي وقف وقفته
لما عربية الزبالة فرمته
والشعب المصري ايه حجته؟؟
وهو نايم في عشته
والكيماوي بياكل في جتته
وحاميه حراميه بيهينه فحتته
ايشي يضربه بالنار في مابين فخذته
وايشي يسبه بأمه ونسبه ونشأته
ومافيش مانع يهدله فرشته
اللي بيسترزق منها ويأكل أسرته
وايه يعني اما يكشف على بنت خالته وعمته
ويشوفهم أشراف ولا زي خلقته
ويمكن ساعتها كمان يوطي يبوس جزمته
أصل مابقاش في دم بيحمر وجنته
الوش اتكسى بسواد سلبيته
ولسى السواد جاي
وحيطول كل اللي قال حي
كل اللي غاص في الدم وكأنه شوية مي
قولهم كلهم لسه السواد جاي
لسه الشهيد مامتش
لسه الشهيد حي
