بقلم الشاعر
محمد ابو علم
ـــــــــــــــــــــ
بحبك يامصر كمدمن خمور
ونبضك فى قلبى كموج البحور
بهمك وحزنك … بحبك فخور
وأسمك عظمته تسكن عدوك كفأر الجحور
وشمسك خروجها لوجهى تقوى الصدور
فى حبك سأكتب خطابى لكل العصور
وأسهر أفكر فى حبك يامصر
بحبك … بحبك … بحبك يامصر
****
شوارعك شبابك بناتك ورود العصور
وناسك واهلك يغنوا كهدير البحور
وأمى وأبويا وأختى وأخويا
حجارة فى أرضك لعدوك قبور
وأدعى فى ركعة وسجدة لربى يصونك يامصر
بحبك …بحبك … بحبك يامصر
****
بهمك وحزنك وأسمك رنينه كدق الطبول
وماشية جيوشك كرقص الخيول
بحبك يافاجرة ياغادرة يابنت الاصول
بحبك … بحبك كمدمن خمور
****
تركتك سافرت لأنك مهانة
وأسمك مدون فى كتب مصانه
وأنك يابلدى فى صدرى أمانه
بحبك يابلدى يامصر المهانه
بحبك …بحبك …بحبك يامصر
****
فى ليلك فى نيلك كتبت لعذارى
كتبت كثير لرمال الصحارى
كتبت لربى من غدر الليالى
وحبك فى قلبى كنقش الحجارة
****
بحبك ياغادرة ياتاركة ولادك لغدر الزمان
ودنيا لا فيها الرجال ولا فيها الامان
وفيها الرشاوى ودايرها الجبان
بحبك يابلدى يامصر المهانة
بحبك يأمى يا أرض الكنانة
بحبك بحبك كمدمن خمور
بحبك بحبك بحبك يامصر
ــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ
