بقلم الشاعر
طه متولى رضوان
مين اللي قال إن الوطن
أرض و سما ؟
مين اللي قال إن الوطن
شمس و سحاب ؟
كلمة وطن يعني الأمان
وسط العذاب
يعني ألقى مية نيلي صافية
مش سراب
يعني الهوا الصافي
بدون ذرة تراب
يعني العدالة
بين ولاد شلة صحاب
مش لما الاقي ابن الوزير
يبقى وزير
و القاضي
عين ابنه قاضي بالكتاب
و الضابط اللي بيحمي بيتنا
بيطاردنا .تقول كلاب
و ابن الفقير وسط الخراب
طب لما الاقي بلدنا غابة
مطلوب تكون
عايش غنم بين الديابة
مطلوب تعيش من غير تاريخ
وسط الخيابة
علشان تعيش لازم تكون
دايما خبيث
من غير طيابة
يبقى الوطن يعني السراب
متجيش تقولي حب وطنك
وطني خلاص
بقى سجن يابني
أصل الوطن مسكوه كلاب
بيقولوا أسيادنا
و إحنا من العبيد
بيشغلوا ولادهم
و ابني أنا عايش طريد
و بيبنوا في قصورهم
و أنا قضبان حديد
بيكتروا فلوسهم
و أنا تحت الجليد
صدقوني
لو لقيت وطني هجيه
و هجمع أحفادي
و أعيش من تاني فيه
و اوهب حياتنا و روحنا ليه
لكن لحد ما الاقي وطني
من جديد
هفضل سراب
هفضل كده
عايش حزين
وسط العذاب
و لما ينده لي الوطن
هجري عليه جوة الكفن
و لما اغيب عن حضن أولادي
قولولهم ده اندفن تحت التراب
===================
الشاعر طه رضوان
