بقلم الشاعر
جمال المناخلى
أنا كنت ماشي من سكات
زي صابر واسماعين ومسعدة
وابراهيم وأم البنات
ماحنا اتخرسنا كلنا
من همنا …..أنا
وحلمنا
جوانا مات
………
وبخاف كمان اقرا الورق
أصل الورق
فيه أسامي اللي سرق
واللي حرق
واللي سابنا ف مفترق
تصديع دماغ
خلي اللي خايف ع البلد
يرمي الهموم
ع اللي خلق
………
أنا مواطن مستكين
قالوا يمين يبقي يمين
وأقول شمال طيب لمين
قالها أبويا من زمان
أطلب حقك يا ولد
ما تستحي
وإلجأ لربك واستعين