بقلم الأديبة الكاتبة
الأستاذة منى صلاح
نائبة رئيس فرع المنظمة فى مصر
كان ياما كان ومايحلى الكلام الا بذكر النبي عليه الصلاة والسلام ،كان فيه زمان امبراطور من ورق كل الحكاية أنه فضل على بعضه وباقي الورق قصقصهم الزمان وصاروا قصاقيص ورق طايرين .
هو قال حجمعهم واعمل عليهم امبراطور بما اني انا الوحيد اللي على بعضي جمعهم وخطب فيهم وقالهم ايه رأيكم يا قصاقيص ابقه عليكم رئيس قالو له وايه المقابل يعني قالهم انا حقف في وش الريح احميكم ومن الشمس اغطيكم وبليل اطوي نفسي عليكم عشان تدفوا قالوله موافقين وفي المقابل نعمل ايه ؟؟ قال انتم تعملولي تشريفة وفي الرايحة والجاية تسقيفه وأما تعدي كارتونه ولا خشبه كلكم تشتموها وتقولها يا ضعيفة يا خفيفة خف الريشة قالوله موافقين وفضلت الورقة عامله على القصاقيص رئيس والخشبة تعدي تتشتم وتضحك في سرها وتسكت وساعات تتوجع وتدمع وبرده تقول اهم قصاقيص صغيرين حعملهم ايه يعني .
وفي يوم السماء غيمت والدنيا ظلمت وبدأت تمطر مطر خفيف وكل شوية يقوى راحوا القصاقيص للامبراطور الورق قالوله ارجوك احمينا قالهم احميكم ازاي انا ورق زيي زيكم المطر حيبوشني وحنموت كلنا روحوا للخشب يحميكم قالوله بس الخشبة اكيد زعلانه لاننا ياما هزقناها وشتمناها .
وهم بيتكلموا المطر بدأ يزيد ويعلى وكلهم عاموا على وش الميه واتبعتروا والامبراطور وقع و غرق لانه اتقل منهم وفجأة ظهرت الخشبة من تحت المية وجمعتهم كلهم فوقيها و جت كمان خشبه وضللت عليهم لحد ما المطر وقف والشمس طلعت والقصاقيص نشفت بدأوا يشكروا الخشبة ويعتذرولها هي قالتلهم القوي دوره يحمي الضعيف مش يستغل ضعفه لانه ممكن في لحظة يكون في مكانه.
